Azərbaycan Respublikasının Konstitusiyasına istənilən dəyişiklər yalnız Azərbaycan xalqının iradəsilə qəbul oluna bilər. Day.az saytının məlumatına görə, bunu cümə axşamı jurnalistlərə ABŞ-ın ölkəmizdəki səfiri Enn Dersi bəyan edib.

“ATV İnternational” telekanalı üçün dəmir konstruksiyalı üçmərtəbəli bina qurulacaq. Kanal bundan sonra fəaliyyətə başlayacaq. Yeni binanı iki-üç aya qurmaq planlaşdırılıb. Bunu “Media forum” saytına “Azad Azərbaycan” Teleradio Yayım Şirkətinin vitse-prezidenti Natiq İbrahimov deyib.

Martın 11-də Regnum informasiya agentliyi Bakıda dələduzluğa görə iki qəzetin baş redaktorlarının saxlanıldığını xəbər verir. «Dövlət qanunları» və «Respublika qanunları» qəzetlərinin baş redaktorları Nazim Quliyev və Zəmanət Əzimova qarşı «hədə-qorxu yolu ilə tələb etmə» maddəsilə cinayət işi açılıb.

Associated Press Barak Obamanın şəklinin qeyri-qanuni istifadəsinə görə günahlandırdığı rəssam Şepard Feyri barəsində Manhetten məhkəməsinə qarşılıqlı iddia verdiyini bildirir.

Heydər Əliyev Fondunun prezidenti, millət vəkili Mehriban Əliyevanın Milli Məclisə təqdim etdiyi “Amnistiya aktı haqqında” qanun layihəsi martın 17-də parlamentin müzakirəsinə çıxarılacaq. Bunu “Media forum” saytına Milli Məclisin hüquq siyasəti və dövlət quruculuğu məsələləri daimi komissiyasının üzvü, Ana Vətən Partiyasının sədri Fəzail Ağamalı deyib.

RİA Novosti «Sərhədsiz reportyorlar» beynəlxalq təşkilatının«İnternetdə söz azadlığı günü» keçirmək haqqında qərar verdiyini bildirir. Aksiya təşkilatçıları ictimaiyyətin diqqətini dünyanın bir sıra ölkələrində sərt şəbəkə senzurasının olmasına cəlb etmək istəyirlər. «İnternetdə söz azadlığı Günü» martın 12-də keçiriləcək.

«İnterfaks» agentliyi Alma-Atada jurnalistlərin şəhər məhkəməsinin binası qarşısında piket keçirdiyini xəbər verir. Müxtəlif nəşrlərin jurnalistləri «Tasjarqan» qəzetinin parlamentin deputatı Romin Madinovun xeyrinə 30 milyon tenqe (200 min ABŞ dolları) cərimələnməsinə qarşı etiraz ediblər. Müxalifət qəzetində «latifundist» adlandırılan deputat şərəf və ləyaqətinə yetirilmiş ziyanın ödənilməsini tələb edib.

The New York Times və 16 nəşrin məxsus olduğu The New York Times Company (NYTC) ofis binasının bir hissəsini satıb. Məlumatı The New York Times qəzeti yayıb. Satdığı binanı icarəyə götürən şirkət borcların ödənilməsinə nəzərdə tutduğu 225 milyon dolları əldə edə bilib.

Miami Herald və bir sıra nəşrlərin sahibi McClatchy Co. şirkəti 1.6 min əməkdaşının ixtisara düşməsi haqqında bəyan edib. Məlumatı yayan AFP agentliyinin məlumatına görə, buna səbəb qeyri-sabit maliyyə vəziyyəti və reklam gəlirlərinin aşağı düşməsidir.

«Ferqana.ru! saytı bazar günü Qırğızıstanda «OşTV» teleradio şirkətinin baş operatorunun döyüldüyünü xəbər verib. Hadisə martın 7-də Oş şəhərində baş verib. Saat 21:00-da Zaynabiddinov küçəsində baş verən hadisə zamanı beyin sarsıntısı və çoxsaylı zədələr almış jurnalist Oş şəhər xəstəxanasının travmatologiya şöbəsinə çatıdırılıb.

Vəkil İsaxan Aşurov «Bizim yol» qəzetinin əməkdaşı Müşviq Hüseynovun xəstəliyi ilə bağlı cəzadan azad olunması xahişilə Əzizbəyov rayon məhkəməsinə müraciət edib. Bunu Reportyorların Azadlığı və Təhlükəsizliyi İnstitutuna istinadə Day.az saytı xəbər verir.

Türkiyənin baş naziri Rəcəb Tayıp Ərdoğan «24» kanalına müsahibəsində Ankaranın heç vaxt Azərbaycanın maraqlarına zidd siyasət yürütməyəcəyini bəyan edib. Məlumatı Türkiyənin Azərbaycandakı səfirliyi yayıb.

Azərbaycan qanunvericiliyinə edilən dəyişikliklərə əsasən ali təhsili olmayan şəxslər və əcnəbilər kütləvi informasiya vasitələrində redaktor vəzifəsində çalışa bilməz. Martın 6-da Milli Məclisin iclasında «Kütləvi informasiya haqqında» Qanunun 19-cu maddəsinə əlavə və dəyişikliklər edilmişdir.

Türkiyədə dövlət çevrilişini hazırlamaqda şübhəli bilinən Cumhuriyet qəzetinin jurnalisti Mustafa Balbay həbs edilib. Məlumatı AFP agentliyi yayıb. 2008-ci ilin iyul ayında jurnalist bu işlə bağlı həbs olunsa da, dindirilmədən sonra azadlığa buraxılmışdır. O vaxt Balbayla birlikdə daha 24 nəfər saxlanılmışdır. Lakin Balbay qəti surətdə sui-qəsdçilərlə əlaqəsini inkar edir.

«Aziya-Plyus» informasiya agentliyi Tacikistanda Rusiyanın «RTR-Planeta» telekanalının yayımının bərpa olunacağını xəbər verir. Agentliyin məlumatına əsasən, Rusiya tərəfi texniki xidmətlərin tariflərinin artımı ilə bağlı Tacikistanın «Teleradiokom» şirkətinin şərtləri ilə razılaşıb. Bir müddət əvvəl «RTR-Planeta» kanalının yayımı məhz bu məsələ ilə bağlı fikir ayrılığına görə dayandırılmışdır.